10. trinn

18. apr.

Tema: verdiar og val

Kven er du? Kven vil du vere om 5 år? Kva verdiar har du? Kvar trur du verdiane dine kjem frå? Kva er du stolt av ved deg sjølv? Kva for ulike identitetar eller roller har du i ulike settingar? Korleis blir du påverka av andre sine val? Er det lett å ta eigne val? Kan du seie nei til ting som bryt med verdiane dine? Korleis kan du bidra til at dei rundt deg opplev samhald og tilhøyrsle? Kva håpar du andre ser i deg? Dette er nokon av spørsmåla elevane skal reflektere og jobbe med i tema verdiar og val. Elevane blir godt kjent med skulen sitt verdigrunnlag gjennom ulike aktivitetar som til dømes å lage podcast, skrive lesarbrev og lage ein mini-dokumentar om miljøutfordringar i lokalmiljøet og kva som kan gjerast. Elevane kan få inspirasjon gjennom prosjektet «Light lines» som brukar kreative verkemiddel for å få frem bodskapen om klimautfordringar og naturvern, med fjella som omkransar Sogn.

Kompetansemål etter 10. trinn
KRLE
- Reflektere over korleis identitet, sjølvbilete og eigne grenser blir utvikla og utfordra i ulike fellesskap, og presentere forslag til korleis ein kan handtere påverknad og uønskte hendingar
- Utforske og drøfte etiske problemstillingar knytte til kvardagsliv og samfunn
Samfunnsfag
- Drøfte korleis framstillingar av fortida, hendingar og grupper har påverka og påverkar haldningane og handlingane til folk
- Gjere greie for årsaker til og konsekvensar av sentrale historiske og notidige konfliktar og reflektere over korleis ekstreme haldningar og handlingar kan førebyggjast
- Reflektere over kva for aktørar som har makt i samfunnet i dag, og korleis desse grunngir standpunkta sine
- Utforske ulike plattformer for digital samhandling og reflektere over korleis digital deltaking og samhandling påverkar forma på og innhaldet i samfunnsdebatten
Norsk
- kjenne att og bruke språklige verkemiddel og retoriske appellformer
- informere, fortelje, argumentere og reflektere i ulike munnlege og skriftlege sjangrar og for ulike formål tilpassa mottakar og medium
Naturfag
- Gi døme på og drøfte aktuelle dilemma knytte til utnytting av naturressursar og tap av biologisk mangfald
Overordna del i læreplanverket:
Skolen skal gi elevane moglegheit til å medverke og til å lære kva demokrati betyr i praksis. Skolen skal fremje demokratiske verdiar og haldningar som motvekt mot fordommar og diskriminering. Skolen skal òg skape respekt for at menneske er ulike, og at elevane skal lære å løyse konfliktar på ein fredeleg måte. Likeverd og likestilling er verdiar som er kjempa fram gjennom historia, og som framleis må takast vare på og styrkjast. Skolen skal formidle kunnskap og fremje haldningar som sikrar desse verdiane. Barn og unge skal handtere dagens og morgondagens utfordringar, og vår felles framtid er avhengig av at kommande generasjonar tek vare på kloden (Overordna del - verdiar og prinsipp for grunnopplæringa i læreplanverket.)

«Du har to primære valg i livet;
du kan velge å akseptere tingenes tilstand eller du kan velge å ta ansvaret for å gjøre noe med det»

— Denis Waitley

Forslag til ulike økter

Under finn de forslag til undervisningsmateriell for 10. trinn. Øvingane er tilpassa alder og utviklingsnivå, samstundes veit me at det er store variasjonar innad i ei klasse, eller frå 10. klasse det eine året til 10. klasse eit anna år. Gjer difor dei justeringane du meiner er naudsynt for at oppgåvene skal passe klassa di.