10. trinn

18. apr.

Tema: mangfald

Undervisninga handlar om viktige verdiar som likeverd, forståing, aksept, fellesskap, respekt og solidaritet - eit inkluderande samfunn med rom og plass til alle. Elevane skal forstå dilemma som ligg i å anerkjenne både retten til fleirtalet og rettane til mindretalet. Kva betyr identitet? Kan ein ha ulike identitetar, trur de? Kva betyr det å ha fordommar, kva er kvardagsrasisme og mikroaggresjon? Kvifor er det viktig å fortsatt markere Pride? Kva gjer du for at andre skal kjenne seg trygg saman med deg? Er døme på spørsmål elevane skal reflektere over og svare på. Dei skal ha aktiviteten “Kven er eg og kven er du?”, lage eit identitetskart og reflektere over gruppetenking. Kva er faren med å berre sjå menneske som delar av ei gruppe? Kva kan vere bra med å kjenne seg som ein del av ei gruppe? Dei skal og lage ei teikning eller eit tankekart med tittelen: "Eg er meir enn det du ser”.

Kompetansemål etter 10. trinn
Samfunnsfag
- reflektere over likskapar og ulikskapar i identitetar, levesett og kulturuttrykk og drøfte moglegheiter og utfordringar ved mangfald
- reflektere over korleis identitet, sjølvbilete og eigne grenser blir utvikla og utfordra i ulike fellesskap, og presentere forslag til korleis ein kan handtere påverknad og uønskte hendingar
- drøfte korleis framstillingar av fortida, hendingar og grupper har påverka og påverkar haldningane og handlingane til folk
- reflektere over korleis menneske har kjempa og kjempar for endringar i samfunnet og samstundes har vore og er påverka av geografiske forhold og historisk kontekst
- beskrive sentrale lover, reglar og normer og drøfte kva konsekvensar brot på desse kan ha for den enkelte og for samfunnet på kort og lang sikt
KRLE
- utforske perspektiva til andre og handtere usemje og meiningsbryting
- reflektere over eksistensielle spørsmål knytte til det å vakse opp og leve i eit mangfaldig og globalt samfunn
I følge Utdanningsdirektoratet skal barnehagen og skulen ta omsyn til mangfaldet av barn og unge, og legge til rette for at alle får oppleve å høyre til. Å markere Pride vil vere ei god anledning til å løfte felles verdiar som barnehage og skule bygger på. Overordna del av læreplanverket seier at skulen skal formidle kunnskap og fremme haldningar som sikrar likeverd og likestilling.

«Ingen blir født med et hat mot andre på grunn av hudfargen deres, bakgrunnen deres eller religionen deres. Hat må læres, og hvis folk kan lære å hate, kan de også lære å elske, for kjærlighet faller mer naturlig for menneskehjertet enn hatet gjør»

— Nelson Mandela

Forslag til ulike økter

Under finn de forslag til undervisningsmateriell for 10. trinn. Øvingane er tilpassa alder og utviklingsnivå, samstundes veit me at det er store variasjonar innad i ei klasse, eller frå 10. klasse det eine året til 10. klasse eit anna år. Gjer difor dei justeringane du meiner er naudsynt for at oppgåvene skal passe klassa di.